O Rock in Cambre continúa sumando novas incorporacións ao cartel da súa edición de 2026 coa confirmación de Me Fritos and the Gimme Cheetos, unha das bandas máis singulares e divertidas do panorama estatal actual.

Formados en 2016, os asturianos construíron unha proposta propia a partir dunha idea tan sinxela como efectiva: transformar cancións coñecidas por todos nunha auténtica festa de punk-rock melódico. O resultado son concertos cargados de enerxía, humor e participación do público que os converteron nun fenómeno cada vez máis habitual nos principais festivais do Estado.

Ao longo dos últimos anos a banda pasou por escenarios de referencia como Viña Rock, Resurrection Fest, Tsunami Xixón, As Revenidas, Alterna Festival ou Pirata Beach Festival, compartindo cartel con algunhas das formacións máis destacadas do rock, o punk e o metal tanto a nivel estatal como internacional.

O seu repertorio rompe con calquera tipo de prexuízo musical. Sobre o escenario son capaces de levar ao seu terreo cancións populares amplamente recoñecibles para o gran público e mesturalas coa intensidade e velocidade propias do punk-rock, xerando unha conexión inmediata cos asistentes e convertendo cada concerto nunha celebración colectiva.

A súa incorporación achega ao Rock in Cambre unha das propostas máis festivas e desenfadadas desta edición, ampliando os rexistros dun cartel que continúa tomando forma e que busca ofrecer experiencias diferentes sen perder a identidade rockeira que caracterizou ao festival ao longo da súa historia.

Me Fritos and the Gimme Cheetos únense así aos nomes xa anunciados de Boikot e Biznaga nunha edición que recuperará os dous días completos de concertos e que contará tamén coa participación de cinco bandas da contorna, reforzando a aposta do festival polo talento local.

Nas próximas semanas o Rock in Cambre continuará desvelando novas incorporacións e sorpresas para unha edición que volverá converter Cambre nun dos puntos de encontro da música en directo en Galicia.