- Diana Piñeiro avanza que o Goberno local prevé deixar saldados antes de finais de marzo os atrasos correspondentes ás actualizacións salariais de 2024 e 2025.
- Reactívanse comisións paralizadas dende hai anos e dáse impulso á actualización da RPT municipal.
O Concello de Cambre continúa avanzando na resolución de diversas cuestións pendentes relacionadas co persoal municipal, cun conxunto de medidas destinadas a dar resposta a reivindicacións reiteradas e a situacións que se viñan arrastrando de etapas anteriores.
Neste contexto, a alcaldesa, Diana Piñeiro, explica que o Goberno local xa ten actualizadas as nóminas do persoal municipal incorporando os incrementos salariais correspondentes aos anos 2024 e 2025, e que se procederá agora ao aboamento dos atrasos derivados desta situación. Segundo indica, a previsión é que todos os pagos queden regularizados antes de finais deste mes de marzo.
Estas actuacións dan continuidade a demandas trasladadas polo persoal municipal nos últimos anos e responden á vontade do Goberno local de avanzar cara á normalización da situación laboral e retributiva. Neste sentido, Diana Piñeiro sinala que “trátase de afrontar cuestións que levaban tempo pendentes e de construír unha administración máis ordenada e xusta co seu persoal”.
Ademais, nos últimos meses o Concello procedeu á convocatoria de varias comisións que levaban tempo sen reunirse e que constituían unha demanda reiterada por parte da representación sindical. En concreto, reactiváronse a comisión paritaria, a de produtividade e a do plan de pensións, órganos clave para o desenvolvemento das condicións laborais do persoal municipal. A rexedora incide na relevancia de recuperar estes espazos de traballo e negociación.
Outro dos avances destacados é a tramitación das axudas sociais correspondentes aos anos 2022 e 2023, que permanecían sen resolver e que actualmente se atopan en fase de revisión por parte de Intervención.
Así mesmo, púxose en marcha unha mesa técnica de traballo, integrada por persoal funcionario, co obxectivo de avanzar na actualización da Relación de Postos de Traballo (RPT), unha ferramenta clave para a organización dos recursos humanos do Concello. Este órgano xa mantivo dúas reunións e continúa avanzando na súa organización e nas liñas de actuación.
Diana Piñeiro destaca que estas medidas responden a un compromiso claro do Goberno local para corrixir unha situación inxusta que se viña prolongando no tempo, avanzar na estabilidade laboral e garantir a recuperación plena dos dereitos do persoal municipal.
